«Учуутал күнүгэр» аналлаах тэрээһиннэр

Ааспыт нэдиэлэҕэ аан дойдутааҕы учуутал күнүгэр лиссиэй учууталларыгар аналлаах үгүс тэрээһин ыытылынна. Ол курдук, ССРС норуодунай учуутала, Саха сиригэр физмат оскуолалар хамсааһыннарын саҕалаабыт тэрийээччи, Михаил Андреевич Алексеев, пааматынньыгар учууталлар, иитээччилэр, нөҥүө күнүгэр үөрэнээччилэр баран сибэкки уурдулар. Ил Дархан А.С. Николаев бэйэтинэн кэлэн кыттан, ыалдьыттар санааларын өрө-көтөҕөн тэрээһин суолтата өссө үрдүк таһымнаахтык ааста.

Үөрэнээччилэр учууталларын эҕэрдэлээн олус истиҥ кэнсиэр көрдөрдүлэр. 8 кылаастар сыаҥка көрдөрөн, көрөөччүлэри сөхтөрдүлэр, күллэрдилэр, 7 кылаастар ылбаҕай ырыаларын бэлэхтээтилэр уонна Правительство оҕолоро хас биирдии учууталга сэмэй бэлэхтэрин туттардылар. Субуотаҕа бэйэни салайыныы күнүгэр үөрэнээччилэр уруоктары үөрэ-көтө ыыттылар.

Ону таһынан, алтынньы 7 күнүгэр 8-9 кылаастар оскуола үлэһиттэрин кытта волейболга күрэхтэһэн сүргэлэрэ көтөҕүлүннэ.